الزوج وزوجته

الحاجات الحلوة بس عننا تتقال..والحاجات التانية تتشال

- في مقولة بتقول : في كلام يتقال وفي كلام يتشال..وده بيرجع لزكاء الإنسان وحضوره الاجتماعي ودراسته لأبعاد كل كلمة من كلامه رايحة فين وتأثيرها إيه

- في راجل بيقول كلام وبيندم بعد مايقوله..ولانه راجل وفاكر انه لما يعتذر رجولته تتهز هيفضل على غلطه.. وفي ستات بتقول كلام وبتندم بعد ما بتقوله.
طب الناس تعرف عننا ايه؟؟ في العلاقة الزوجية معروف "ممنوع الاقتراب والتصوير " الشعار ده هو الصح واللي بيحصل عكس كده

-الست تحكي لأهلها وللناس القريبين منها عن أخلاق الزوج الحلوة وكل حاجة حلوة فيه..والراجل يحكي لأهله وللناس القريبين منه عن أخلاق مراته الحلوة وطباعها الحلوة وكل حاجة حلوة فيها....ده الكلام اللي يتقال

-الست والراجل في العلاقة الزوجية طبيعي يحصل بينهم مشاكل وطبيعي يكون في كل واحد فيهم عيوب وطباع مش حلوة.. بس اللي مش طبيعي ان مع كل هفوة نهتك ستر البيت ده.. ومع كل مشكلة كبيرة وصغيرة نحكي وننشر غسيلنا اللي مش نضيف قدام أمه لا إله الا الله

-الأهل دورهم في حياتنا النصيحة الحلوة اللي تبني مش تهد وتكره..والست والراجل الواعيين مايسمعوش كلام فيه تسخين على الطرف التاني.. علشان كده بنقول للراجل والست في كلام يتقال وفي كلام يتشال

-الكلام اللي يتشال.. علاقتنا الزوجية الجنسية مافيش مخلوق يعرف بيها حاجة.. وفي عادة غريبة ومالهاش علاقة بإسلامنا ولا تقاليدنا الصح .. لازم الست تقول على جوزها بعد ليلة الدخلة ده "تمام" أو ده "مش تمام" مع ان الراجل في ليلة الدخلة أو حتى في أول أسبوع ممكن مايكونش وصل لدرجة الثقافة في أمتاع الزوجة .. وده بيرجع للطابع الجنسي لكل راجل وبيختلف من راجل للتاني ومن شاب للتاني .. وده مابيبانش إلا بعد الجواز

-الكلام اللي يتشال برضة.. طباع زوجتي وطباع زوجي..ممكن الطباع دي من وجهة نظري تكون عيب فيه..طب العيب ده نقدر نعالجه نقدر نتعايش معاه .. نقدر ننصح ونصبر..وان الله مع الصابرين..والله لما يصبروا هينولوا
- أي مشكلة بنا تتحل بنا وماتخرجش بنا أحنا الأتنين.. ودي نصيحة مهمة جداً لكل راجل وكل ست..ممكن مايكونش عندك الخبرة الكافية في حل مشكلتك.. ماتدخلش حد.. واسمع النصيحة دي أسئل حد موثوق فيه ومن بعيد لبعيد عن كذا مشكلة وكيفية حلهم ومن ضمن المشاكل دي هتحط مشكلتك..عشان بكدة تبقى حافظت على ماء وجهك وماء وجه زوجتك.. وتبقى عرفت طريقة حل المشكلة..ده لو أنت خبرتك قليلة في حل المشاكل

-أما بقى لو أنت بتعرف تحل المشكلة وتحللها وتشوف أسبابها إيه وأزاي المشكلة دي تتحل بدون ماترجعوا تقعوا فيها تاني .. حلها في هدوء بدون ماحد يعرف عنكم حاجة

-هتستفادي إيه..يا كل ست لما أي مشكلة تروحي تقوليها لأهلك وأنت هتستفاد إيه لما تروح تقول الكلمتين اللي تعبينك في مشكلة ممكن تكون بسيطة أو عبيطة بس أنت مافكرتش في أبعاد الكلام ده.. أهلك أو أهلها هيشيلوا في قلبهم الكلام اللي أتقال ومن عند أهلها أو أهلك..دي بتعمل وبتسوي فيه.. ده موريها الويل..ده أحنا أخدنا فيها مقلب..أحنا شربنا الجوازة دي..الكلام ده وغيره كتير ممكن يتقال .. واللي بيحصل أنك أنت ومراتك مالكومش غير بعض.. ومسيركم تصالحوا بعض وتصفوا.. لكن أهلك وأهلها بيفضلوا شايلين في قلبهم ومع تراكم الشيل الحمل بيزيد ومع مشكلة تانية أكبر هتلاقيهم انفجروا زي أنبوبة بوتجاز بنملاها غاز..فوق طاقتها لحد ما أنفجرت

-أخيراً الكلام اللي يتقال هو الصفات الحلوة فينا.. لان الحاجات دي بتسيب طابع في نفوس الناس وخصوصاً اهلك وأهلها..ولما تحصل مشكلة لاقدر الله هتلاقيهم فاكرين الحاجات الحلوة دي وجايين بقلب يصلحوا مش يخربوا.. والكلام اللي يتشال جوانا هو الكلام اللي مايصحش أي حد ماهما كان قريب مننا يعرفه سواء كان مشاكل أو عيوب في شخصيتنا أو علاقتنا الجنسية..ونصيحة أخيرة أي مشكلة تتحل في نفس اليوم لأن الشيطان مابيصدق.. وأحنا مش ناقصين الشيطان مش كفاية مشاكلنا المادية اللي هي اساسها ابتلاء من ربنا وجزء من ابتلاء ربنا لينا سببه ذنوبنا..فبلاش مع ذنوبنا كمان نقوي الشيطان علينا في علاقتنا الزوجية كمان مش كفاية مش قادرين عليه برة العلاقة وربنا يقدرنا عليه جميعاً..وياريت نعرف إيه اللي يتقال وإيه اللي يتشال