كش ملك

ضحيت بالطابيتين والوزير والعساكر
ضحيت بابنك الصغير والكبير ولسة فاكر
ان شعبك ماشى بالزمبلك
لا ياريس
كش ملك
انت لعيب شطرنج كبير
وفاهم كويس يعنى ايه
ملك من غير طابيتين ووزير
يعنى فى وضع بجد خطير
يعنى نهاره اسود ميتالك
كش ملك
عارف كويس انك لعيب ومحاور
طبعك عنيد وشديد ومناور
وعارف كمان قدرتك انك تحاور
وانك بتلعب لاخر نفس
وعارف كمان
انك بتراهن عاليهود والامريكان
يلحقوك
ده كان زمان
لما كانوا بيحتاجوك
وزى مابعت دينك عشانهم
هم النهارده بيبعوك
للى يحكم ويمتلك
كش ملك
ياريت متلعبش على عنصر الوقت
دة اللى تحت طلعوا فوق
واللى فوق اتحدفوا تحت
اللى طلعوا ..طلعوا يبنوا
بعد ما شبعوا رديم وفحت
ياريتك تكون ارتحت
بعد ماخليت البلد
مصيرها اسوأ من تيتانك
كش ملك